او يشوف برنامج حياتى
او اى برنامج مختص بالمشاكل الزوجية
كنا نقعد نقرا و نتفرج و احنا قلبنا متقطع على صاحبة المشكلة
غالبا صاحبة مشكلة لان الستات بتشتكى اكتر
المهم
و تبقى المشكلة معقدة و مشبكة و مسددة و متبقاش عارف تتحل ازاى
يعنى معاناة حقيقية
بستغرب جدا دلوقتى اما تاخد جولة كدا فى مواقع الاسرة و تشوف المشكلات الزوجية و اسباب الطلاق
تلاقى ايه
جوزى صعب اوى اوى اوى
شعره ابيض من الجمبين ومش بيرضى يصبغه
وانا زهقت شكله كبر و مكبرنى معاه
وكرهته و نفسيتى تعبت منه
الخ الخ
واحدة تانية بقى ..عكس الاولانية دى على طول
جوزى بيصبغ شعره كل اسبوع لون مختلف
وتعبلى اعصابى كل شويه الاقى شكله اختلف
و نفسيتى تعبت انا منهارة الحقونى
هطلب الطلاق
واحدة تالته
جوزى عايزنا فى العيد نروح لمامته اول يوم و مامتى تانى يووم
هو بيعاملنى كدا ليه
هو فاكرنى ايه
انا وحشة والا ايه
انا عاوزة اطلللللق
جوزى عاوزنى اصحى افطره كل يوم
هو عيل صغير ما الاكل موجود فى التلاجة
ما ياكل اللى عاوزه
انا معايا طفل" واحد"
وواخد كل وقتى
انا خلاص تعبت وزهقت و قرفت
غيره
جوزى طيب وحنين و كريم
بس انا من عشرتاشر سنة كنت بحب واحد تانى
وبكره جوزى لان اهلى وافقو عليه و موافقوش على غراب البين التانى
انا عاوزه اطلللق بقى و بتمناله الموت !!
جوزى بيرجع متأخر
بياكل و ينام
وانا مع العيال هو موفرلنا كل حاجة
بس انا ساحسيي و مشاعيري
وفقاقيعي اتفقعت
و عاوزه اطلق هو انا هفضل كدا لحد امتى
اللى بعده
جوزى بينام كتير اوى اوى
حتى يوم اجازته بينام طول اليوم
وهو شغال "نجار مسلح"
"طالع عين اللى خلفوه طول الاسبوع"
وانا تعبت حاسه انى مش مجوزه
وبحقد على اصحابى اللى اجوازهم بيرجعولهم بدرى
وبيفسحوهم
وعشان كدا انا عاوزه اطلق
يعنى سبحان الله
يبقوا متسربعين على الجواز
و فى نفس الوقت متسربعين على الطلاق
خلل غير عادى فى التفكير و فى اهداف الزواج
و نكران و جحود للنعم
و عمى قلوب
و ضماير
بيخلى النوعيات اللى زى كدا تضخم مشكلة لا تستحق
بس بالنسبة لها بتكون كفاية عشان تخرب بيتها
و اول ما تطلق تندم و تعيط وتقول يا ريتنى
طيب ما انتو كنتو معززين مكرمين
مجوزين
استغربت جدا حقيقي و اتفقعت مراررتى وانا
بشوف ناس كل شاردة وواردة فى حياتهم الزوجية
ومع اول تاتش او لمجرد الفراغ مش عارفه
يروحوا اووووع
دلقينها فى اى موقع على انها مشكلة المشاكل
و اللى تقول انا هولع فى نفسى و هنتحر حالا
وانا بتقطع
ليه بجد ليه ؟
الصراحة أنا زهقت
هاقوم اطش الملوخية و راجعة