من طرف 
أختي
ما بقتش تتكلم معايا زي زمان
السلام عليكم.. في الحقيقة المشكلة مش مشكلتي
أنا، مشكلة أختي، وأنا نفسي أساعدها ومش عارفة إزاي.. هي أختي الكبيرة
عندها 27 سنة كانت بتحب الهزار وبتضحك، بس من ساعة ما دخل في حياتها زميلها
في الشغل وحياتها اتقلبت 180 درجة، بقت كئيبة على طول وحزينة.. زميلها ده
متجوز وهي اتعلقت بيه جامد أوي، وموضعهم بدأ من حوالي 3 سنين.
هو
زميلها جه اتقدم لها وفي البيت رفضوا وقالوا إنهم مش يقبلوا بواحد متجوز،
اتقدم كذا مرة والرد هو هو ما اتغيرش، أختي تعبانة جدا بسببه، مش عارفة
تنساه ومش قادرة تبعد عنه، وكذا مرة تشوفه هو ومراته صدفة في شارع كانت
بتموت فعلا، وكل مرة تقول هابعد عنه مش بتبعد، ماما نصحتها وبابا وناس كتير
بس مافيش فايدة، هي سابت الشغل قلنا ممكن لما يبقى بعيد عنها تنسى، بس
بالعكس بيكلمها على التليفون، وكل ما تاخد قرار إنها تبعد عنه يكلّمها
ويتحايل عليها وما تبعديش عني وكلام من ده، وتضعف وتفضل معاه.
بتقول
إن هو صعبان عليها عشان عنده القلب، وساعات بتقول إنها بتكلمه عشان مافيش
واحد في حياتها تتكلم معاه..
آخر مرة شافته مع مراته بالصدفة أغمى عليها
في الشارع، وقعدت تعيّط، وانهارت لدرجة إنها راحت له عند بيته الساعة
واحدة بالليل وقعدت تشتم نفسها، وفضحته في الشارع، وعملت تصرفات غريبة جدا،
مش تربيتنا ولا أسلوبنا..
أنا وماما مش عارفين إيه الحل، نتصرف
معاها إزاي؟ ماما تعبانة جدا بسببها وأنا مش عارفة أفكّر، مش لاقية حل
لأختي، ما بقتش تتكلم معايا أوي زي الأول، عشان أنا ضدها في موضوع زميلها..
أنا بجد محتارة جدا، ومش عارفة أعمل إيه، وناس كتير اتقدموا لها بس مش
مناسبين، وحكاية إن إخواتها اللي أصغر منها واحدة اتجوزت وأنا اتخطبت، حاسة
ده مأثر فيها أكتر عشان هي الكبيرة، هي راحت قبل كده لدكتور نفساني بس مش
ارتاحت.. وعلى فكرة زميلها ده مش أول واحد في حياتها، هي حبّت قبل كده مرة
بس مش حصل نصيب منه، بس مافيش حد أثر معاها زي ده، وهي دايما تقول اشمعنى
ده اللي متعلقة بيه كده؟ هي مش عارفة ليه، ولا إحنا، وماما كلمت زميلها كذا
مرة عشان يبعد عنها بس ما كانش بيبعد.
ياريت تردو عليه ضروري.. بجد
أنا محتارة جدا، ونفسي في حل، عايزة أعرف أتكلم معاها أقول إيه أو ماما
تقول لها إيه عشان تشيل الموضوع ده من دماغها؟
